ब्रेकिंग

वीज खंडीत झाल्याने पाणीपुरवठा विस्कळीत

Samruddhi Dhayagude
27 May 2025

पुणे: पर्वती जलकेंद्रांतील विद्युत यंत्रणेत सोमवारी रात्री दीड वाजता बिघाड झाल्याने या जलकेंद्रांतून पाणीपुरवठा होणार्‍या शहरातील मध्यवर्ती पेठा, पर्वती, सहकारनगर आणि संपुर्ण बिबवेवाडी परिसरातील पाणीपुरवठा सोमवारी दिवसभर विस्कळीत झाला. सकाळी साडेनऊ वाजता दुरूस्तीचे काम पूर्ण झाल्यानंतर काही भागात कमी दाबाने पाणीपुरवठा झाला. मात्र, या जलकेंद्रावर अवलंबून असलेल्या उर्वरीत भागातील नागरिकांना ऐन पावसात पाणी टंचाईला सामोरे जावे लागले.

पर्वती जलकेंद्राला वीज पुरवठा करणार्‍या वीज मंडळाची केबल रात्री दीडच्या सुमारास शॉर्ट सर्किटमुळे जळाल्याने जलकेंद्राचा विद्युत पुरवठा खंडीत झाला. यामुळे पाणीपुरवठा बंद राहिला. पर्वती जलकेंद्र हे शहरातील सर्वात मोठे आणि जलकेंद्र असून या केंद्रातून मध्यवर्ती पेठा, शिवाजीनगरचा काही भाग, पर्वती, सहकारनगर, पदमावती, बिबवेवाडी, मार्केटयार्ड अशा मोठ्या भागात पाणीपुरवठा होतो. सकाळी पाऊस सुरू असताना नळाला पाणी न आल्याने नागरिकांची चांगलीच ओढाताण झाली. वीज मंडळाच्या कर्मचार्‍यांनी तातडीने दुरूस्तीचे काम हाती घेतले. सकाळी साडेनऊ वाजता केबल जोडण्याचे आणि दुरूस्तीची कामे पूर्ण झाल्याने पुन्हा जलकेंद्र सुरू झाले. परंतू गरजेपेक्षा कमी पाणी असल्याने सर्वप्रथम मध्यवर्ती पेठांमधील पाणीपुरवठा कमी दाबाने सुरू करण्यात आला.

उर्वरीत पंपिंग स्टेशनपर्यंत पाणी पोहोचण्यास विलंब झाला. परंतू रात्री उशिरापर्यंत सर्वच ठिकाणी पाणीपुरवठा सुरळीत करण्याचे प्रयत्न सुरू होेते. काही ठिकाणी मागणीनुसार टँकरने पाणीपुरवठा करण्यात आल्याची माहिती पाणी पुरवठा विभागाचे प्रमुख नंदकुमार जगताप यांनी दिली.